मज वेड लावले तु सांगू नको कुणाला…

मागील रविवार दिनम २४ मे रोजी पराग पारीख फ्लेक्झीकॅपने १३ वर्षे पूर्ण करून १४ व्या वर्षात पदार्पण केले. समभाग गुंतवणूककरणाऱ्या सक्रीय व्यवस्थापित फंडात सर्वात मोठी मालमत्ता असलेला हा फंड आहे. या फंडाची पहिली शिफारस २५ मे २०१५ त्या नंतर २०१६, २०१८ २० मे २०२४ मागील वर्षी २८ एप्रिल २०२५ आणि रोजी या फंडाचा आढावा घेण्यात आला होता. असा एखादा फंड क्वचितच आढळतो जो सर्व प्रकारच्या गुंतवणूकदारांना उपयुक्त ठरतो. ‘पराग पारीख फ्लेक्सी कॅप’ फंड हा फंड असाच एक फंड आहे जो मागील १३ वर्षांच्या दीर्घ कालावधीत मोठी संपत्ती निर्माण केलेला एक अव्वल फंड आहे. पराग पारीख लॉंग टर्म व्हॅल्यु फंड ते पराग पारीख फ्लेक्झीकॅप या प्रवास अनुभवणे ही रंजक गोष्ट आहे. केवळ फ्लेक्झीकॅप फंड गटातच नव्हे तर सक्रीय व्यवस्थापित समभाग गुंतवणूक करणाऱ्या फंडात सर्वाधिक मालमत्ता असणारा हा फंड आहे. सातत्यपूर्ण कामगिरी करणारा आणि केवळ स्वतःच्या ‘बेंचमार्क’लाच नव्हे, तर या फंड गटात तेरा वर्ष पूर्ण केलेले १७ फंड असून परताव्याच्या क्रमवारीत हा फंड दुसऱ्या स्थानी आहे. फंड गटातील बहुतेक फंडांना मागे टाकणारा हा फंड आहे. गुंतवणूकदाराच्या पोर्टफोलिओचा ‘मुख्य भाग’ (कोअर) म्हणून समाविष्ट करण्यासाठी हा फंड अत्यंत योग्य फंड आहे. हा फंड ‘व्हॅल्यु फंड’ म्हणून अस्तित्वात आल्याने साहजिकच या फंडाची रणनीती ‘मूल्याधारित गुंतवणुकीवर’ अहे; हा फंड भारताबाहेर सूचीबद्ध असलेल्या कंपन्यांत गुंतवणूक करून आपल्या पोर्टफोलिओत वैविध्य साधत असतो. सध्या या फंडाच्या गुंतवणुकीत मायक्रोसॉफ्ट, मेटा प्लॅटफॉर्म (फेसबुक), अल्फाबेट (गुगल) अॅमेझॉन या चार कंपन्यांचा समावेश आहे. या फंडाचे दुसरे वैशिष्ठ्य म्हणजे निधी व्यवस्थापक समभाग गुंतवणूक आणि रोख रक्कम कर्जसाधनांमध्ये योग्य प्रमाणात गुंतवणूक करून जोखीम नियंत्रित करतात. या फंडाच्या गुंतवणुकीत जानेवारी फेब्रुवारी २६ मध्ये ३५ टाक्यांच्या आसपास रोख रक्कम होती. मार्च मधील घसरणी दरम्यान ही रोख रक्कम गुंतविण्यात आली. सध्या भूराजकीय परिस्थितीमुळे निर्देशांक उच्चांका पासून १२ -१५ टक्के घसरले असतांना विविध उद्योग क्षेत्रांतील कंपन्यांच्या समभागांच्या किमती २०-४० टक्क्यांनी घसरल्या आहेत. त्यामुळे गुंतवणुकीची आकर्षक संधी निर्माण झाली आहे. ‘मूल्याधारित गुंतवणूक’ सद्य स्थितीत एक अत्यंत फायदेशीर पर्याय ठरतो. युद्ध समाप्तीच्या औपचारिक घोषणेनंतर बाजारपेठेत पुन्हा तेजी आल्यास, त्या तेजीचा लाभ घेण्यासाठी या फंडगटात ‘पराग पारीख फ्लेक्सी कॅप’ हा फंड सर्वात सुस्थितीत आहे. अनेक आरंभ शूर गुंतवणूकदार मला दहा वीस वर्षे एसआयपी करायची आहे फंड सुचवा असे सांगतात. प्रत्यक्षात एक दोन वर्षात बाजार घसरणी दरम्यान एसआयपी बंद करतात. खरोखर दीर्घकालीन आर्थिक उद्दिष्टे साध्य करण्याच्या दृष्टीने, या फंडामध्ये ‘एसआयपी’ द्वारे गुंतवणूक सुरू करणे हिताचे ठरेल.