अस्थिर काळातील सोबती

पोर्टफोलीओ रचना

हा फंड समभाग (इक्विटी) आणि रोखे (डेट) यात गुंतवणूक करतो. या फंडाचे गोपाल अग्रवाल (२९ जुलै, २०२२ पासून), अनिल बांबोली (२९ जुलै, २०२२ पासून), अरुण अग्रवाल (६ ऑक्टोबर, २०२२ पासून), ध्रुव मुच्छल (२२ जून, २०२३ पासून), नंदिता मेनेझेस (२९ मार्च, २०२५ पासून) आणि इहाब दलवाई (११ सप्टेंबर, २०२६ पासून) निधी व्यवस्थापक आहेत. ताज्या उपलब्ध आकडेवारीनुसार ३० सप्टेंबर २०२६ रोजी फंडाची मालमत्ता १.०२ लाख कोटी होती. फंडाची किमान ६५ टक्के मालमत्ता समभाग गुंतवणुकीत असते. मालमत्ता वाटप आणि समभाग आणि रोखे गुंतवणूक करण्याचा निर्णय घेण्यापूर्वी अनेक घटकांचा निधी व्यवस्थापक विचार करतात. समभाग गुंतवणुकीला अस्थिरतेपासून सुरक्षित ठेवण्यासाठी डेरिव्हेटिव्ह्जचा वापर केला जातो. गुंतवणुकीचे विभाजन हे तत्कालीन बाजारमूल्यांकन आणि व्यापक आर्थिक परिस्थितीवर (समष्टी) अवलंबून असते. समभाग गुंतवणुकीचे प्रमाण निश्चित करण्यापूर्वी मागील बारा महिन्यांचा ‘प्राईस-टू-अर्निंग्ज रेशो’, ‘अर्निंग्ज यील्ड’ आणि सरकारी रोख्यांवरील परताव्याच दर (जी सेक यिल्ड) यांचा गुणोत्तर, महागाई, वित्तीय स्थिती, व्याजदर आणि बाह्य वातावरण यांचा आढावा घेतला जातो. उदाहरणार्थ, मार्च २०२० मध्ये जेव्हा बाजारात मोठी घसरण झाली, तेव्हा आणि त्यानंतरच्या संपूर्ण वर्षात, या फंडाची इक्विटीमधील गुंतवणूक (हेजिंग न केलेली) ८० टक्क्यांहून अधिक होती. त्यानंतर २०२१ मध्ये हे प्रमाण हळूहळू कमी करण्यात आले. २०२२ च्या बहुतेक काळात ही गुंतवणूक ६० ते ६८ टक्क्यांच्या दरम्यान ठेवण्यात आली होती आणि २०२३ च्या सुरुवातीला ती पुन्हा कमी करण्यात आली. सप्टेंबर २०२४ पासून पुन्हा समभाग गुंतवणूक वाढविण्यात आली. तथापि, फंडाला समभाग कररचनेचा लाभ मिळवण्यासाठी, समभाग आणि संबंधित (डेरीव्हेटीव्हज) साधनांमधील गुंतवणूक ६५ टक्के किंवा त्यापेक्षा जास्त राखली जाते. समभाग गुंतवणुकीचा मोठा हिस्सा ‘निफ्टी १००’ मधील ‘लार्ज-कॅप’ कंपन्यांच्या समभागात गुंतविला जातो. त्यामुळे, हा भाग बऱ्यापैकी स्थिर आणि मध्यम जोखमीचा असतो. कर्जरोखे विभागामध्ये सुरक्षितता (क्रेडीट रेटिंगज), रोकड सुलभता आणि परतावयाचा दर यांवर भर दिला जातो. यामध्ये सरकारी रोखे आणि उच्च मानांकन (ट्रिपल ए पत) असलेले कॉर्पोरेट बाँड्सच समावेश असल्याने, पत जोखीम (कर्ज बुडण्याची जोखीम) नगण्य किंवा शून्य असते. मात्र, व्याजदरांचा अंदाज घेऊन हा फंड आपल्या गुंतवणुकीचा कालावधी (ड्युरेशन) सक्रीय व्यवस्थापित केला जातो. उदाहरणार्थ, सध्या व्याजदर निच्चांका जवळ होते आणि वाढ होण्याची शक्यता लक्षात घेऊन गेल्या १२ महिन्यांत फंडाने आपल्या गुंतवणुकीचा सरासरी कालावधी (residual maturity) हळूहळू कमी करायला सुरवात केली आहे. थोडक्यात सांगायचे तर, ‘एचडीएफसी बॅलन्स्ड ॲडव्हांटेज फंड’ हा एक दर्जेदार फंड आहे. ज्या गुंतवणूकदारांची जोखीम घेण्याची क्षमता कमी ते मध्यम आहे, त्यांच्या ‘कोअर होल्डिंग’ मध्ये हा फंड समाविष्ट करण्यासाठी योग्य ठरू शकतो. ५-१० वर्षांच्या कालावधीसाठी एसआयपी देखील प्रभावी ठरू शकतात.