कॅनरा रोबेको मिडकॅप फंड उद्या ३ वर्ष पूर्ण करीत आहे. गुंतवणूकदार दीर्घकालीन एसआयपीच्या मार्गाने संपत्ती निर्मिती करू इच्छित असेल तर किंवा तुमच्या पोर्टफोलिओमध्ये नव्याने एखाद्या मिडकॅप फंडात एसआयपी करू इच्छित असाल तर कॅनरा रोबेको मिडकॅप फंडाचा वाचकांनी जरूर विचार करावा. या फंडाने २ डिसेंबर २०२३ ते २८ नोव्हेंबर २०२५ या तीन वर्षाच्या कालावधीत वार्षिक २०.६५ टक्के दराने परतावा दिलेला असून याच कालावधीतील कामगिरीच्या यादीत हा फंड आठव्या स्थानी आहे. ऑक्टोबर अखेरीस ३८४८ कोटीची मालमत्ता असणाऱ्या या फंडाची शिफारस एनएफओ वेळी केली होती. ज्या वाचकांनी या फंडाने एक रक्कमी किंवा एसआयपी पद्धतीने गुंतवणूक केली असेल त्यांना या फंडाने नक्कीच निराश केले नाही. कॅनरा रोबेको मिडकॅप फंड किमान ५ वर्षांसाठी गुंतवणूक करू इच्छिणाऱ्या कोणत्याही गुंतवणूकदारासाठी आदर्श फंड आहे. मॉर्निंगस्टार एखाद्या फंडाला तीन वर्षाच्या कालावधी नंतर त्या फंडाचे ‘स्टार रेटिंग’ ठरते. या फंडाला ‘फोर स्टार रेटिंग’ मिळेल असा अंदाज आहे. तिसऱ्या वर्षपूर्ती नंतर (एप्रिल २०२६) हा फंड ‘लोकसत्ता कर्ते’ म्युच्युअल फंड यादीत समावेश होण्याची आणि दीर्घकालीन एसआयपी शिफारस प्राप्त यादीचा भाग असेल असे वाटते. जर वाचकांची जोखीम घेण्याची क्षमता जास्त असेल, तर आणि तुम्ही ‘मिड-कॅप’प्रेमी गुंतवणूकदार असाल तर हा मिडकॅप फंड नक्कीच तुम्हाला निराश करणार नाही. अर्थात, हा एक मिडकॅप फंड असल्याने, तुमच्या जोखीमांकानुसार या फंडात एकूण पोर्टफोलीच्या १० ते १५ टक्क्यांपेक्षा अधिक गुंतवणूक करणे हिताचे होणार नाही. बाजारातील मोठ्या तेजीतून भांडवली लाभ मिळवू इच्छिणाऱ्या आणि काही प्रमाणात अस्थिरता सहन करण्याची क्षमता असलेल्या गुंतवणूकदारांसाठी, मिड-कॅप फंडात गुंतवणूक करणे हा दीर्घकाळात संपत्ती निर्मितीचा एक फायदेशीर निर्णय असू शकतो. फार कमी वेळा मिडकॅपचे मुल्यांकन वाजवी असते. मूल्यांकन वाजवी असो अथवा नसो प्रत्येक वेळी अनेक संधी उपलब्ध असतात. या संधी हुडकून योग्य कंपनीत देर्घ्कालीन गुंतवणूक करणे हे निधी व्यवस्थापकाचे काम असते. कॅनरा रोबेको हा मिडकॅप फंड गटात सर्वात सुसंगत आणि उच्च दर्जाची कामगिरी असलेला फंड आहे.