सक्रिय कालावधी व्यवस्थापन

व्याजदर कपातीपश्चात रोख्यांच्या किंमती वाढल्या तरी घसरत्या व्याज दरामुळे फंडाचे उत्पन्न कमी होते. घसरत्या व्याज दर आवर्तनांत फंड गटातील अन्य स्पर्धक फंडांपेक्षा चांगला परतावा दिला आहे. फंड गटातील काही फंडांनी २०२१ मध्ये सरासरी परिपक्वता (एव्हरेज मॅच्युरीटी) सक्रियपणे कमी केली. रिझर्व्ह बँकेने मे २०२२ पासून व्याज दर वाढवण्यास सुरवात करण्यापूर्वी, अर्थव्यवस्थेतून अतिरीक्त रोकडसुलभता कमी केली. त्यावेळी मुदतीचे सक्रीय व्यवस्थापन करण्याचे धोरण कामी आले. या सक्रिय व्यवस्थापनामुळे उत्पन्न वाढल्याने संभाव्य बारातिल घसरणीमुळे (मार्क-टू-मार्केट) नुकसान कमी झाले. या कालावधीत, फंडाने ‘ट्रिपल-ए’) रोख्यांमध्ये ८५ टक्के वाटप राखले, ज्यामुळे २०२१-२२ दरम्यान कमी व्याज-दर टप्प्यात आणि मे २०२२ च्या वाढत्या-दर टप्प्यात हा फंड या फंड गटात सर्वोच्च कामगिरी करणाऱ्यां फंडांपैकी पैकी होता. वाढत्या व्याज दर कालावधी नंतर फंडाने सरासरी परिपक्वता फेब्रुवारी २०२३ पासून वाढवला, त्याची सरासरी परिपक्वता साडेपाच वर्षांपर्यंत वाढवली. दरम्यानच्या काळात मानदंड रोख्यांचे उत्पन्न (केंद्र सरकारच्या १० वर्षांच्या रोख्यांचे उत्पन्न) ७.५ टक्क्यांवरून सध्या ६.७३ टक्क्यांपर्यंत घसरले आणि ‘ट्रिपल-ए’ आणि ‘पीएसयु’ रोख्यांचे उत्पन्न ८ टक्क्यांवरून ७.५ टक्क्यांपर्यंत घसरले. सध्या, फंडामध्ये सार्वभौम रोखे आणि उच्च-पत धारण करणाऱ्या रोख्यांचा समतोल साधला आहे. उच्च रोकड सुलभता हे पोर्टफोलिओचे वैशिष्ठ्य आहे. भविष्यात दर कपातीमुळे भांडवली लाभ होणार असला तरी, कमी व्याजदरामुळे फंडाचे उत्पन्न घराणार आहे. अलीकडील जागतिक घडामोडी भारतीय रोख्यांमध्ये विदेशी गुंतवणूकदारांनी दाखविलेला रस रोखे बाजारात अस्थिरता वाढण्याची शक्यता आहे. याव्यतिरिक्त,रोखे गुंतवणुकीवर मिळालेल्या उत्पन्नावर गुंतवणूकदारांच्या कर कक्षेनुसार कर आकारणी होणार आहे. उच्च-गुणवत्तेच्या मुदत ठेवींच्या तुलनेत रोखे गुंतवणूक करणाऱ्या फंडातील गुंतवणूक कमी कर कार्यक्षम असली तरी रोकड सुलभता आणि वैविध्यामुळे आणि दीर्घ काळ मुद्दलाच्या चक्रवाढीची संधी साधू इच्छिणाऱ्या गुंतवणूकदारांना हा फंड अजूनही आकर्षक गुंतवणूक आहे.

नियमित योजनेसाठी फंडाचे खर्चाचे प्रमाण ०.५१ टक्के आहे, जे फंड गटाच्या सरासरीच्या ०.७० टक्के खर्चाच्या प्रमाणापेक्षा कमी आहे. फंडाने सुरवातीपासून (३ मार्च १९९७) पासून वार्षिक ८.९१ टक्के दराने परतावा दिला आहे. मागील २० वर्षात फंडाने ८.०४ टक्के एसआयपी परतावा दिला आहे. गेल्या १० वर्षांच्या नक्त मालमत्ता मूल्याच्या (एनएव्ही) विदेवरून मोजलेल्या २० वर्षातील ५ वर्षांच्या चलत सरासरीद्वारे मोजल्या गेलेल्या कामगिरीवरून असे दिसून येते की फंडाने ९५.७६ टक्के वेळा ८ टक्यांपेक्षा अधिक परतावा दिला आहे. सेवानिवृत्त आणि भांडवली बाजारातील अस्थिरतेची जोखीम टाळू इच्छिणाऱ्या गुंतवणूकदरांसाठी बँकमुदत ठेवींच्या तुलनेत रोकडसुलभ आणि बँकेच्या मुदत ठेवींपेक्षा अधिक परतावा देणारा हा फंड आहे. गेली २७ वर्षे समईच्या संथ तेवणाऱ्या ज्योतीसारखा हा फंड असून परताव्यात सातत्य राखलेलाहा फंड आहे. ‘१०० वजा वय’ या सूत्राला अनुसरून दीर्घकालीन गुंतवणूक करावी असा हा फंड आहे.