रंग माझा वेगळा
टाटा मल्टीसेक्टर पॅसिव्ह फंड्स ऑफ फंडाच्या एनएफओमध्ये गुंतवणूक करावी का?
एखाद्या उद्योग क्षेत्रात गुंतवणूक आकर्षक वाटू शकले तरी उद्योग क्षेत्र निवडण्यात चूक होण्याची शक्यता नाकारता येत नाही. गुंतवणूकदार अनेकदा एखादे उद्योग क्षेत्र तेजीत असताना (किंबहुना शिखारावर असतांना) त्यात गुंतवणूक करतात आणि जेव्हा शिखरावरून खालच्या दिशेला उद्योग चक्राचा प्रवास सुरु होतो, तेव्हा गुंतवणूक काढून घेतात असे नाही. टाटा मल्टी सेक्टर पॅसिव्ह फंड्स ऑफ फंड्स ऑफ फंड ही समस्या वेगळ्या पद्धतीने सोडवण्याचा प्रयत्न करेल . फंड-ऑफ-फंड्स (एफओएफ) रचनेचा वापर करून निष्क्रिय (पॅसिव्ह) देशांतर्गत उद्योग क्षेत्रातील समभाग गुंतवणूक एक्सचेंज ट्रेडेड फंड्स (ईटीएफ)च्या माधमातून केले जाईल. हे बाजारातील आवर्तन , मूल्यांकन आणि समष्टी आर्थिक संकेतांनुसार मालमत्ता वाटप बदलेल. फंडाचा एनएफओ २२ जून रोजी सुरु झाला असून ६ जुलै पर्यंत सुरु राहील. टाटा म्युच्युअल फंडाचे विविध पॅसिव्ह सेक्टरल फंड असून (उदाहरणार्थ टाटा निफ्टी ऑटो इंडेक्स फंड, टाटा इंडिया डिजिटल इटीएफ) गेल्या काही वर्षांत, फंड घराण्याच्या या निष्क्रिय फंडांनी चांगली कामगिरी केली आहे. मानवी भावना, ताज्या घडामोडींचा प्रभाव आणि बाजारातील अल्पकालीन अस्थिरतेच प्रभाव कमी करणे, हा यामागील उद्देश आहे. ज्या गुंतवणूकदारांना सेक्टरल फंडात गुंतवणूक करायची आहे, परंतु गुंतवणूक केवळ माध्यमातील बातम्यांच्या आधारे न करता ‘डेटा ड्रिव्हन’ पद्धतीने करायची आहे, त्यांच्यासाठी हा एनएफओ एक शिस्तबद्ध ‘सॅटेलाइट असेट अलोकेशन’ म्हणून काम करू शकतो. महत्त्वाचे म्हणजे, याला डायव्हर्सिफाइड इक्विटी फंडाचा पर्याय म्हणून न पाहता, दीर्घकालीन पोर्टफोलीओची ‘सेक्टर-रोटेशन’ पद्धत म्हणून पाहिले पाहिजे. टाटा मल्टीसेक्टर पॅसिव्ह फंड्स ऑफ फंडाची ‘सेक्टर वेट्स’ एका संरचित, भविष्याचा वेध घेणाऱ्या प्रारूपाद्वारे ठरवले जातील. हा फंड उद्योगांचा प्रभाव सक्रिय व्यवस्थापित करेल तर प्रत्यक्ष गुंतवणुकीसाठी निष्क्रिय फंडांचा साधन म्हणून वापर करेल. फंड व्यवस्थापक मूल्यांकनानुसार आणि स्थूल-आर्थिक परिस्थिती, संबंधित क्षेत्रांचा मूलभूत संशोधन आणि गती (मुमेंटम)इत्यादी घटकांसारख्या मापदंडांवर विसंबून मालमत्तेचे क्षेत्रीय निष्क्रिय फंडात वाटप करेल. विविध क्षेत्रांच्या विकासाचे चालक घटक समजून घेण्यासाठी फंड मॅनेजर आर्थिक परिस्थिती, बाजाराची परिस्थिती आणि भविष्यातील दृष्टिकोनाचे मूल्यांकन करण्याचा प्रयत्न करेल. ‘निफ्टी ५०० इंडेक्स टीआरआय हा या फंडाचा मान दंड असून राहुल सिंग हे या फंडाचे नियुक्त निधी व्यवस्थापक आहेत.
जरी हा फंड प्रामुख्याने टाटा म्युच्युअल फंडाच्या फंडात गुंतवणूक करेल, तरीही तिला इतर म्युच्युअल फंड घराण्यांच्या पॅसिव्ह फंडात गुंतवणूक करण्याची मुभा असेल. हा फंड रोखे आणि मनी मार्केट इन्स्ट्रुमेंट्समध्ये देखील गुंतवणूक करू शकते, ज्यामध्ये रिव्हर्स रेपो, सरकारी रोखे किंवा ट्रेझरी बिलांवरील ट्रायपार्टी रेपो आणि/किंवा मालमत्ता वाटप विभागात वर नमूद केलेल्या इतर तत्सम साधनांचा समावेश आहे.
पोर्टफोलिओ मंथन: योजनेतील पोर्टफोलिओचे मंथन बाजारातील संधींवर अवलंबून असेल. पोर्टफोलिओमधील संभाव्य उलाढालीचा अचूक अंदाज लावणे कठीण आहे. म्युच्युअल फंड आणि त्याच्याशी संबंधित व्यवस्थापन खर्च लक्षात घेऊन, जोखीम-समायोजित परतावा मिळविण्यासाठी पोर्टफोलिओ मंथन इष्टतम करण्याचा प्रयत्न करेल. अधिक पोर्टफोलिओ मंथन हे पोर्टफोलिओच्या कामगिरीवर नकारात्मक परिणाम करतोच असे नाही आणि तो बाजारात उपलब्ध असलेल्या गुंतवणुकीच्या संधींचे निदर्शक असू शकतो. फंड ऑफ फंड्स फंडांना पोर्टफोलिओ मंथनाचा नियम लागू होत नाही.
धोरण: टाटा मल्टीसेक्टर पॅसिव्ह फंड्स ऑफ फंडाच्या विविध सेक्टर ईटीएफ / पॅसिव्ह फंडातील गुंतवणूक निश्चित नाही. आर्थिक पार्श्वभूमी आणि बाजारातील संकेतांनुसार ही गुंतवणूक सेक्टर ईटीएफमध्ये बदलते. बाजार सुधारणा, विस्तार, चक्राच्या आकंचन टप्प्याची स्थिती किंवा मंदीच्या टप्प्यातून जात आहे का, याचे मूल्यांकन करण्यासाठी वाढ, दर, महागाई, कमाईचे कल आणि मूल्यांकन यांचा मागोवा घेतला जातो. याचा उद्देश सर्व चक्रांमध्ये सक्रीय राहणे हा आहे. याचा अर्थ असा की, सुरुवातीच्या सुधारणा आणि विस्ताराच्या काळात ते चक्रीय क्षेत्रांमध्ये (उदाहरणार्थ, ऊर्जा) गुंतवणूक वाढवू शकते, अनिश्चितता किंवा मंदीच्या काळात बचावात्मक गुंतवणूक (उदा. आयटी, फार्मा) वाढवू शकते, आणि ज्या क्षेत्रांमध्ये मूल्यांकन मूलभूत मूल्यांपेक्षा जास्त आहे अशा अतिउत्साही क्षेत्रांमधील गुंतवणूक कमी करू शकते. मूल्यांकन हा फंडाच्या मालमत्ता वाटप पद्धतीचा एक महत्त्वाचा भाग आहे. हा फंड केवळ क्षेत्राच्या अलीकडील कामगिरीवर अवलंबून न राहता, अशा क्षेत्रांचा शोध घेते जिथे जोखमीच्या तुलनेत संभाव्य वाढ आकर्षक वाटते. तसेच, ते विविध क्षेत्रांमध्ये आणि बाजार भांडवली विभागांमध्ये गुंतवणूक करू शकते.
‘यु हॅव टू बी अॅक्टीव्ह इन पॅसिव्ह फंड्स अॅण्ड पॅसिव्ह इन अॅक्टीव्ह फंड्स’ असे एक वचन आहे. “सक्रिय” असणे म्हणजे केवळ एक इंडेक्स फंड किंवा ईटीएफ निवडून त्याला विसरून जाण्याऐवजी, तुमच्या पोर्टफोलिओसाठी पॅसिव्ह फंड निवडणे, आणि त्याचे व्यवस्थापन करणे. तुम्ही मालमत्ता वाटपावर सक्रियपणे नियंत्रण ठेवता, बाजारात बदल झाल्यावर पोर्टफोलिओचे पुनर्संतुलन करता आणि मूळ निर्देशांक अजूनही तुमच्या आर्थिक उद्दिष्टांशी जुळतात की नाही याचा नियमितपणे आढावा घेणे आवश्यक आहे. तुमच्या पॅसिव्ह गुंतवणुकीमध्ये सक्रिय राहण्यासाठी, या सुवाचानाचे पालन करा. धोरणात्मक मालमत्ता वाटपासाठी केवळ एकच इंडेक्स फंड निवडणे चुकीचे आहे. तुमच्या जोखीम घेण्याच्या क्षमतेनुसार, तुमचे भांडवल वेगवेगळ्या मालमत्ता वर्गांमध्ये (उदा. लार्ज-कॅप, मिड-कॅप आणि आंतरराष्ट्रीय निर्देशांक) कसे विभाजित करायचे हे ठरवा. कालांतराने, काही निर्देशांक इतरांपेक्षा वेगाने वाढतील, ज्यामुळे तुमच्या पोर्टफोलिओचे अपेक्षित प्रमाण विचलित होईल. तुमचे मालमत्ता विभाजन कायम ठेवण्यासाठी, जास्त परतावा देणारे फंड सक्रियपणे कमी करा आणि कमी परतावा देणाऱ्या फंडांमध्ये पुन्हा गुंतवणूक करा. निर्देशांकाचा आढावा घ्या. सर्व निर्देशांक एकाच दराने वाढत किंवा घटत नाहीत. तुमचा फंड ज्या निर्देशांकाचा मागोवा घेतो (उदा. निफ्टी ५०, एस अँड पी ५००), तो अजूनही तुमच्या गुंतवणुकीच्या कालावधीसाठी उपयुक्त आहे आणि त्याच्या क्षेत्रीय भारांमध्ये कोणताही बदल झालेला नाही, याची खात्री करा. ॲक्टिव्ह आणि पॅसिव्ह या दोन्ही प्रकारच्या फंडांचा वापर करा. तुम्ही “कोअर आणि सॅटेलाइट” धोरण अवलंबू शकता. कमी खर्चाचा पॅसिव्ह फंड तुमचा स्थिर कोअर म्हणून कसा काम करतो, तर ॲक्टिव्ह फंड सॅटेलाइट म्हणून काम करून तुमचा अल्फा कसा वाढवू शकतात, हे लवकरच विविध उदाहरणांच्या सहाय्याने लवकरच समजून घेऊ.
तुमची प्रतिक्रिया किवा प्रश्न विचारण्यासाठी खालिल फॉर्म भरा:
Keep in Perspective
Financial decisions can be considered in the context of your goals, time horizon and individual circumstances rather than short-term market movements.
