पुढील सोमवारी पराग पारिख फ्लेक्सी कॅप फंडाला अस्तित्वात आल्याला एक तप पूर्ण होईल. ५ मे २०१३ रोजी सुरवात झालेल्या या फंडाने पहिल्या वर्षपूर्ती आधी ‘लोकसत्ता कर्ते म्युच्युअल फंडां’च्या’ पहिल्या यादीत ‘व्हॅल्यू फंड गटातून जानेवारी २०१४ मध्ये स्थान मिळविले होते. मागील ११ वर्षे कर्त्यांच्या यादीत या फंडाने आपले स्थान अबाधित राखले आहे. गेले १२ वर्षे आपले स्थान कायम राखणारे केवळ ४ फंड असून या चार फंडांपैकी हा एक फंड आहे. पहिल्यांदा या फंडाची शिफारस केली तेव्हा हा पराग पारीख लॉंग टर्म व्हॅल्यू फंड होता, आणि या फंडाची मालमत्ता होती केवळ १४०० कोटी. त्या वेळी या फंड घराण्यांकडे केवळ हा एकमेव फंड होता. आज या फंड घराण्याच्या एकत्रित मालमत्तेने मार्च २०२५ अखेरीस १ लाख कोटींचा टप्पा ओलांडला आहे. सेबीच्या फंड सुसूत्रीकरणानंतर या फंडाला फंड घराण्याने १८ फेब्रुवारी २०१८ पासून फ्लेक्झीकॅप गटात संक्रमित केले. शेवटच्या उपलब्ध आकडेवारीनुसार , ३१ मार्च २०२५ रोजी या फंडाची मालमत्ता ९३३८१ कोटी होती. याच फंड गटात दुसऱ्या क्रमांकावर असणाऱ्या एचडीएफसी फ्लेक्झीकॅपची मालमत्ता याच दिवशी ६९६३९ कोटी होती. पुढील चार पाच महिन्यांत हा फंड १ लाख कोटी मालमत्तेचा टप्पा गाठणारा एकमेव फंड असेल भारतातील सर्व सक्रीय व्यवस्थापित फंडांच्या मालमत्ता क्रमवारीत हा फंड सर्वाधिक मालमत्ता असणारा ‘इक्विटी फंड’ आहे. मागील ३० वर्षांच्या संशोधन आणि गुंतवणूक व्यवस्थापनाच्या कारकिर्दीत असा एखादाच बहुप्रसवा (मल्टी बॅगर) फंड सापडतो, हा फंड सर्व प्रकारच्या बाजार आवर्तनाच्या टप्प्यात आणि ‘इक्विटी फंडा’त गुंतवणूक करू इच्छिणाऱ्या प्रत्येक गुंतवणूकदारासाठी एक आदर्श साधन आहे. मागील ११ वर्षात या सदरातून तीन वेळा (२०१६,२०१८ आणि २०२४) या फंडाची शिफारस केली होती. जे चार भारतीय फंड अमेरिकेत गुंतवणूक करतात त्या चार फंडांपैकी हा एक फंड आहे. या फंडाच्या गुंतवणुकीत अमेरिकेत नोंदणी झालेल्या मायक्रोसॉफ्ट, मेटा प्लॅटफॉर्म (फेसबुक), अल्फाबेट (गुगल) अॅमेझॉन या चार कंपन्या आहेत. या फंडाच्या माध्यमातून मायक्रोसॉफ्ट, मेटा, अल्फाबेट आणि अॅमेझॉन या सारख्या बलाढ्य तंत्रज्ञान कंपन्यांच्या यशोगाथेत सहभागी होता येते. या फंडाच्या माध्यमातून अमेरिकेतील तंत्रज्ञान क्षेत्रातील कंपन्यांतील गुंतवणुकीमुळे पोर्टफोलिओमध्ये विविधता आणता येते. हा फंड ‘कॅश कॉल’ घेणारा फंड आहे. ‘व्हॅल्यु इंवेस्टिंग’ रणनीतीचा अवलंब करणाऱ्या या फंडाने फ्लेक्झीकॅप गटातील सर्वच स्पर्धक फंडांना वेगवेगळ्या कालावधीतील परताव्याच्या तुलनेत सातत्यपूर्ण कामगिरीमुळे सर्वच कालावधीत मागे टाकले आहे. दहा वर्षे कालावधीत एसआयपी परताव्याच्या क्रमवारीत दुसऱ्या क्रमांकाचा (पहिला क्वांटंम फ्लेक्झीकॅप दर २१.२६ टक्के मालमत्ता १० हजार कोटी) हा फंड आहे. हा फंड गुंतवणूकदारांच्या ‘कोअर पोर्टफोलिओ’चा भाग असण्याची क्षमता असलेला हा फंड आहे. सध्या बाजार, मोठ्या घसरणीतून सावरला असला तरी समभागांचे मुल्यांकन अजूनही वाजवी पातळीवर आहे. साहजिकच ‘व्हॅल्यु इंवेस्टिंग’साठी ही एक आकर्षक संधी आहे. मागील महिन्या भरात सेन्सेक्सने घसरणीतून जवळजवळ १० हजार अंकाची कमाई केली असली तरी अनेक समभाग त्यांच्या उच्चांका पासून २० ते ४० टक्क्यांनी अजूनही खाली आहेत.