ज्या वेळी अर्थव्यवस्थेतील रोकडसुलभता तुलनेने कमी होते, आणि बाजारातील अस्थिरता शिखर गाठते त्यावेळी लार्ज अँण्ड मिडकॅप फंडांची कास धरणे हिताचे ठरते. २८ मार्च हा मागील आर्थिक वर्षातील शेवटचा ‘रिपोर्टिंग फ्रायडे’ होता. व्यापारी बँकांनी रिझर्व्ह बँके कडून घेतलेली उचल ३ लाख कोटींपेक्षा अधिक असल्याचे दर्शवित होती. व्यापारी बँकांनी रिझर्व्ह बँके कडून घेतलेली उचल हे अर्थ व्यवस्थेतील रोकड सुलभता मोजण्याचे माप असल्याचे मानले जाते. तर ‘व्हॅल्यू ॲट रिस्क’ (VaR) हे बाजारातील अस्थिरता मोजण्याचे एक सांख्यिकीय परिमाण आहे. हे परिमाण एखाद्या मालमत्तेच्या किंमतीत किंवा पोर्टफोलिओलाच्या मूल्यांकनात विशिष्ट कालावधीत, संभाव्य तोट्याचे प्रमाण ठरवते. ही दोन परिमाणे अर्थव्यवस्थेतील रोकड सुलभता १० वर्षाच्या तळाला तर अस्थिरता ५ वर्षांच्या शिखरावर आहे असे सूचित करते. रिझर्व्ह बँकेने वृद्धीदराबाबत अंदाज ६.७ टक्क्यांवरून ६.५ टक्के करणे आणि महागाई दर ४ टक्के राहण्याची शक्यता व्यक्त करतांना रेपोदारांत पाव टक्क्याची कपात केली. तसेच पत धोरण तटस्थते कडून अनुकूल केल्याने भविष्यात रेपोदरात कपात होईल आणि एक ते दीड टक्का अतिरिक्त रोकड सुलभता राहील. लार्ज अँण्ड मिडकॅप फंड वृद्धी आणि स्थैर्य यांचा समतोल साधणारे असल्याने सद्य परिस्थितीत मोतीलाल ओस्वाल लार्ज अँण्ड मिडकॅप फंडाची ही शिफारस आहे.