अॅक्सीस लार्ज अॅण्ड मिडकॅप फंड येत्या ऑक्टोबर महिन्यांत ८ वर्षे पूर्ण करेल. या फंडाची ३० जुन २०२६ रोजी मालमत्ता १६४९६ कोटी होती. या फंडाची धुरा या आधी जीनेश गोपनी यांच्याकडे होती. ते अॅक्सीस म्युच्युअल फंडातून बाहेर पडल्यावर श्रेयस देवलकर यांची निधी व्यवस्थापक म्हणून नेमणूक झाली. या फंडासाठी हितेश दास, मयंक ह्यंकी, आणि कृष्णा एन या त्यांना सहाय्य करतात. हा फंड लार्जकॅप आणि मिडकॅप सोबत परदेशातील कंपन्यांत गुंतवणूक करतो. सध्या या फंडात भारतीय लार्जकॅप (४४%) आणि भारतीय मिडकॅप (३६%) आणि ८ टक्के परकीय गुंतवणूक आहे. अॅक्सीस म्युच्युअल फंडात श्रोडर्स हे भागीदार आहे ते शेअर्स निवडण्याबाबतचा सल्ला देतात. सेबीच्या मार्गदर्शक तत्त्वांनुसार ‘लार्ज अँड मिड-कॅप फंडां’ना आपल्या एकूण मालमत्तेपैकी किमान ३५ टक्के गुंतवणूक लार्ज-कॅप शेअर्समध्ये आणि किमान ३५ टक्के गुंतवणूक मिड-कॅप शेअर्समध्ये करणे अनिवार्य असते.उर्वरित ३०% यात ६.९२% परदेशी गुंतवणूक समाविष्ट आहे, तर उर्वरित हिस्सा स्मॉल-कॅप शेअर्स आणि रोख रकमेमध्ये गुंतवला आहे. ‘ॲक्टिव्ह फंड’ म्हणजे बेंचमार्कच्या तुलनेत फंडातील कंपन्याच्या प्रभावातील फरक. ‘निफ्टी लार्ज-मिडकॅप २५० टीआरआय’ मध्ये बऱ्यापैकी विविधता असल्याने, फंड व्यवस्थापकाला ‘ॲक्टिव्ह कंपन्यांचे’ प्रमाण बहुतांश वेळा ५० टक्क्यांच्या वर असते. सोप्या भाषेत सांगायचे तर, कंपन्या आणि उद्योग क्षेत्रांचे प्रमाण लक्षणीयरीत्या वेगळे असू शकते. मूल्यांकन किंवा बाजार आवर्तनांमध्ये बदल झाल्यास फंड व्यवस्थापक गुंतवणुकीत फेरबदल (सेक्टर रोटेशन) करतात. बँका, विमा कंपन्या, ग्राहक-केंद्रित कंपन्या आणि निवडक औद्योगिक कंपन्यांमधील वाढलेली गुंतवणूक, तसेच आयटी आणि धातू क्षेत्रातील घटलेली गुंतवणूक, यावरून हे सिद्ध होते. किमान पाच ते सात वर्षांसाठी गुंतवणूक करू इच्छिणाऱ्या गुंतवणूकदारांसाठी एसआयपी (SIP) द्वारे हा फंड खरेदी करणे योग्य ठरेल. या फंडाची निवड पाच आणि तीन वर्षाचे रोलिंग रिटर्न आणि दीर्घकालीन एसआयपी परतावा, फंड गटातील उच्च मानांकन, सातत्यपूर्ण ‘रोलिंग रिटर्न्स’ यांसारख्या भक्कम बाबींवरून केली आहे. या फंडाचा ‘बेस एक्सपेंस रेशो’ (खर्च प्रमाण) रेग्युलर प्लॅनसाठी १.९२ टक्के आणि डायरेक्ट प्लॅनसाठी ०.९१ टक्के इतका आहे. ‘अॅक्सीस लार्ज अँड मिड कॅप फंड’चा समावेश तुमच्या गुंतवणुकीत ‘कोअर-प्लस’ (मुख्य गुंतवणुकीला पूरक) घटक म्हणून करावा. पोर्टफोलिओमध्ये समतोल राखण्यासाठी या फंडाचा समावेश करणे फायदेशीर ठरेल, कारण सध्या या फंडामध्ये लार्जकॅप आणि मिड-कॅप कंपन्यांचा समतोल साधला आहे. विद्यमान गुंतवणूकदार आपली गुंतवणूक सुरू ठेवू शकतात आणि त्यात टप्प्याटप्प्याने भर घालू शकतात; एकदम मोठी रक्कम गुंतवण्याची चूक करू नये. या फंडाचा परताव्याचा इतिहास समाधानकारक असला, तरी त्यातील चढ-उतार तीव्र असू शकतात. ‘ड्रॉडाउन’चे (गुंतवणुकीच्या उच्चांकी मूल्यापासून झालेली घसरण) विश्लेषण केल्यास असे दिसून येते की, गेल्या पाच वर्षात हा फंड दोनदा १०-१२ टक्क्यांनी घसरला होता. त्यामुळे, दीर्घकालीन दृष्टिकोन आणि एसआयपीचा मार्ग निवडणे अत्यंत आवश्यक आहे. जे गुंतवणूकदार हे चढ-उतार सहन करण्यास तयार आहेत, त्यांच्यासाठी दीर्घकाळातील परताव्याची आकर्षक संधी आहे.