निफ्टी १०० किंवा बीएसइ १०० यांनी २७ सप्टेंबर २०२४ रोजी सर्वोच्च स्तर गाठला. गेल्या वर्षभरात विविध आर्थिक आणि भु राजकीय कारणांनी भारतीय बाजारपेठेत मोठी घसरण झाली. ग्राहकांची मागणी कमी होत चालली आहे, भू-राजकीय तणाव आणि अमेरिकेने लादलेले आयात शुल्क या परिस्थितीमुळे सतत परकीय संस्थात्मक गुंतवणूकदार भारतीय समभागांची विक्री करीत होते. तर भारतीय संस्थात्मक गुंतवणूकदार खरेदी करीत आहेत. जीएसटी सुधारणा आणि सरकारी कर्मचाऱ्यांसाठी जानेवारी २०२६ पासून नववा वेतन आयोग लागू होणे यामुळे ग्राहकांकडून मागणी वाढण्याची शक्यता आहे. व्यापार शुल्कांबाबत रोज नव्या बातम्या येत आहेत. सध्याची ताजी बातमी म्हणजे भारत आणि अमेरिका पुन्हा वाटाघाटीच्या स्थितीत आले आहेत. पायाभूत सुविधांवरील सरकारी खर्चात वाढ दिसून येत आहे आणि ‘आर्थिक वर्ष २५’ च्या पहिल्या तिमाहीत ‘जीडीपी’त चांगली वाढ झाल्याचे दिसत आहे. अमेरिकेत फेडरल रिझर्व्हने वर्षाच्या अखेरीपर्यंत आणखी किमान दोन वेळा दर कपात लाराण्याचे जाहीर केले आहे. ही व इतर काही सकारात्मक बाबींमुळे बाजार सावरतांना दिसत आहे. तथापि, बाजारातील तेजीमुळे अनेक ठिकाणी मूल्यांकन वाढलेले आहे. तथापि, लार्ज-कॅप कंपन्या अजूनही वाजवी किमतीचे वाटतात. या पार्श्वभूमीवर मध्यम जोखीम घेण्याची इच्छा असलेल्या गुंतवणूकदारांसाठी भविष्यातील तेजीचा फायदा मिळवण्यासाठी लार्जकॅप केंद्रित फोकस्ड फंड योग्य वाटतो. आयसीआयसीआय प्रुडेन्शियल फोकस्ड इक्विटी फंड (पूर्वीचा आयसीआयसीआय प्रुडेन्शियल सिलेक्ट लार्ज कॅप) हा फंड ५-७ वर्षांपेक्षा जास्त गुंतवणूक कालावधी असलेल्या गुंतवणूकदारांसाठी योग्य आहे.