गेल्या काही वर्षात, विशेषतः कोविड-१९ महामारीनंतरच्या अलिकडच्या वर्षांत, तंत्रज्ञान आणि डिजिटल प्रणालींनी विश्वाला कवेत घेतले असे म्हटले तर चुकीचे ठरणार नाही. फक्त आयटी सेवांव्यतिरिक्त, अनेक क्षेत्रे आता प्रामुख्याने तंत्रज्ञानावर आधारित आहेत. वेळोवेळी फंड सदरीकारणात प्रमुख बाबींवरून भारतीय आयटी, ई-कॉमर्स, मीडिया आणि व्यापक तंत्रज्ञान विभागांचा आवाका स्पष्ट होतो. भारतीय तंत्रज्ञान क्षेत्र ज्यामध्ये देशांतर्गत ($४९ अब्ज) आणि निर्यात ($१७८ अब्ज) विभाग आहेत ते आर्थिक वर्ष २०२२ मध्ये २२७ अब्ज डॉलर्स होते. आर्थिक वर्ष २०२५ पर्यंत हे क्षेत्र ३५० डॉलर्सपर्यंत वाढणार आहे. जागतिक आसोर्सिंग बाजारपेठेत देशाचा वाटा ५९ टक्के आहे आणि या बाबतीत भारत पहिल्या क्रमांकावर आहे. देशांतर्गत ई-कॉमर्स बाजारपेठ २०२५ पर्यंत १८८ अब्ज डॉलर्स आणि २०३० पर्यंत ३५० अब्ज डॉलर्स होण्याची अपेक्षा आहे. भारताचे ओटीटी महसूल २०२२-२७ मध्ये दरवर्षी १४.३ टक्क्यांनी वाढून २०२७ पर्यंत ३.५ अब्ज डॉलर्सवर पोहोचेल. इंटरनेट जाहिराती २०२२-२७ च्या तुलनेत १२.३ टक्क्यांनी वाढून $७.९४ अब्ज डॉलर्सवर पोहोचतील. २०२७ पर्यंत माध्यमे आणि मनोरंजन उद्योगाचे उत्पन्न वार्षिक ९.७ टक्क्यांनी वाढून ७३.६ अब्ज डॉलर्सपर्यंत पोहोचेल. डिजिटल परिवर्तन, क्लाउड कॉम्प्युटिंग (म्हणजे इंटरनेटवरून सर्व्हर, स्टोरेज, डेटासेंटर, नेटवर्किंग, सॉफ्टवेअर, अॅनालिटिक्स आणि इंटेलिजंस यासारख्या संगणकीय सेवांचे वितरण (“क्लाउड”). हे वापरकर्त्यांना मागणीनुसार वापरण्याची परवानगी देते, सामान्यत: त्यांच्या स्वतःच्या भौतिक पायाभूत सुविधांची मालकी आणि देखभाल करण्याऐवजी ते जितका वापर तितके पैसे देतात. जागतिक स्तरावर एंटरप्राइझ खर्चाचा मोठा हिस्सा एआय, डेटा सेंटर डेटा विश्लेषण आणि ऑटोमेशन यांच्याकडे आहे. भारतीय आयटी कंपन्या, त्यांची व्याप्ती आणि क्षमतांसह, या दीर्घकालीन तांत्रिक बदलांचा फायदा घेण्यासाठी सज्ज आहेत. तथापि, अल्पावधीत,कंत्राटदार (अमेरिकेतील कंपन्या) खर्चाबाबत जागरूक झाल्याने कंपन्यांच्या नफ्यातील वाढ मंदावण्याची शक्यता दिसत आहे. जागतिक समष्टी (मॅक्रो) आर्थिक परिमाणांच्या अनिश्चिततेमुळे कंपन्यांच्या कमाईत फारशी वाढ झालेली नाही. एकूण खर्चाच्या बाजूची सावधता असल्याने, नफ्यातील दृश्यमानता कमी झाली आहे. म्हणूनच जानेवारीपासून टेक कंपन्यांच्या बाजार भावात मोठी घसरण झाली आहे. तंत्रज्ञान फंडांसाठी मध्यम ते दीर्घकालीन दृष्टीकोन सकारात्मक राहिला आहे आणि एकूणच, अलिकडच्या घसरणीपश्चात, मूल्यांकन अधिक पातळीवर आले आहे, ज्यामुळे अल्पकालीन परताव्यापलीकडे पाहणाऱ्या गुंतवणूकदारांसाठी या क्षेत्रातील मुल्यांकन आकर्षक बनले आहे. टेक कंपन्यांचा नफा ६ ते ८ टक्के दराने वाढतो. सध्या टेक कंपन्यांचा वृद्धीदर २-३ टक्के इतका खालावला आहे. नजीकच्या काळात अमेरिकेने भारतावर २५ टक्के आयात कर लादण्याच्या धोरणाचा तोटा तंत्रज्ञान क्षेत्राला मोठ्या प्रमाणात होईल. तरी सध्याची घसरण दीर्घकालीन गुंतवणूकदारांसाठी गुंतवणुकीची आकर्षक संधी देते. सध्याची जागतिक अनिश्चितता लक्षात घेता, एकरकमी गुंतवणुकी ऐवजी २४ महिन्यांची एसआयपी किंवा २४ महिन्यांच्या एसटीपीद्वारे टप्प्याटप्प्याने गुंतवणूक करणे शहाणपणाचे ठरेल. या फंडाला एकूण पोर्टफोलीओ मध्ये ५-७ टक्क्यांपेक्षा अधिक स्थान देऊ नये. तसेच परताव्याच्या अपेक्षा १० टक्के दरम्यान असावी. टेक फंड हे ‘कोअर अँण्ड सॅटेलाइट’ रणनीतीपैकी सॅटेलाइट पोर्टफोलीओचा हिस्सा असावा. महत्त्वाचे म्हणजे, बहुतेक लार्जकॅप, मल्टीकॅप, फ्लेक्झीकॅप फंडांनी आधीच तंत्रज्ञान क्षेत्रातील कंपन्यांत गुंतवणूक केली आहे. विशेषतः लार्ज-कॅप फंडांच्या माध्यमातून तुम्ही आधीच टेक कंपन्यांत गुंतवणूक केली असेल, तर टेक फंडांत वेगळी गुंतवणूक करण्याची गरज कदाचित भासणार नाही.