मनातल्या या पूर्णातल्या अपूर्णाची आस
वर्ष २०२६चे पहिले सहा महिने नि:संशय स्मॉलकॅपचे राहिले आहे , तर याच काळात मोजक्या लार्जकॅप फंडांची कामगिरी वगळता अन्य लार्जकॅप फंडांची कामगिरी निराशजनक झाल्याचे दिसत आहे . एक वर्ष पूर्ण केलेले ३४ फंड असून केवळ ११ फंडांनी नफा कमविला आहे तर अन्य फंडांना एक वर्षे गुंतवणुकीवर तोटा झाला आहे. लार्ज-कॅप कंपन्यांत ‘व्हॅल्यू-बाइंग’ची (कमी किमतीत चांगल्या शेअर्सची खरेदी) संधी निर्माण झाल्याचे चित्र असले, तरी बाजाराचा अचूक अंदाज वर्तवणे कधीच शक्य नसते. गुंतवणूकदारांना यापैकी कोणत्याही विभागातील तेजीचा लाभ घेता यावा आणि त्याच वेळी एखाद्या विभागाची कामगिरी खालावल्यास होणारे नुकसान मर्यादित ठेवता यावे, यासाठी ‘लार्ज-अँड-मिड-कॅप’ श्रेणीतील फंड्स एक उत्तम पर्याय ठरतात. सेबीच्या नियमांनुसार, लार्ज-अँड-मिड-कॅप फंडांना त्यांच्या पोर्टफोलिओपैकी किमान ३५ टक्के गुंतवणूक लार्ज-कॅप शेअर्समध्ये आणि आणखी ३५ टक्के गुंतवणूक मिड-कॅप शेअर्समध्ये करणे अनिवार्य आहे. गुंतवणूकदार ‘कॅनरा रोबेको लार्ज अॅण्ड मिडकॅप (जुना ‘कॅनरा रोबेको मर्जिंग इक्विटीज’) या फंडाचा विचार करू शकतात. वीस वर्षांपूर्वी हा फंड एक मिड-कॅप फंड म्हणून अस्तित्वात आला. परंतु सेबीने २०१८ मध्ये सुसुत्रीकरणाचे नवीन नियम जाहीर केल्यानंतर, मे २०१८ मध्ये याचे रूपांतर ‘लार्ज-अँड-मिड-कॅप’ श्रेणीत करण्यात आले. पूर्वी मिड-कॅप फंड असल्याने, यात मिड-कॅप शेअर्समध्ये ६५ टक्के किंवा त्याहून अधिक गुंतवणूक केली जात असे, ज्यामुळे जोखीम अधिक होती. २०१८ मधील पुन:र्रचने नंतर लार्ज-अँड-मिड-कॅप फंड योजना झाल्याने गुंतवणुकीतील जोखीम कमी झाली आहे. . ‘लार्ज-कॅप’ समभागांचे भाव वाढत असताना, गेल्या वर्षभरात या फंडाने लार्जकॅप मधील आपली गुंतवणूक ५० टक्क्यांहून अधिक केली आहे. सध्या लार्जकॅपचे प्रमाण ५१.९७ आणि मिडकॅपचे प्रमाण ३५.१७ टक्के राखले आहे. त्यामुळे मध्यम स्वरूपाची जोखीम घेण्याची तयारी असलेल्या गुंतवणूकदारांसाठी हा फंड योग्य आहे. ‘लोकसत्ता कर्ते म्युच्युअल फंड यादीचा मागील १२ वर्षे भाग असलेल्या या फंडाची मागील १८ महिन्यांतील कामागीरी निराशाजनक राहिली आहे. ‘कॅनरा रोबेको लार्ज-अँड-मिड-कॅप’ची सप्टेंबर २०२५ पासून कामगिरी खालावण्यास सुरवात झाली. परिणामी कधीकाळी ‘फाइव्ह स्टार’ रेटिंग असलेल्या फंडाचे रेटिंग खालावून सध्या मॉर्निंगस्टारने ‘थ्री स्टार’ रेटिंग केले आहे. जुन्या गुंतवणूकदारांच्या परताव्यात फारशी घसरण झाली नसली तरी २०२२ नंतर ‘एसआयपी’ला सुरवात केलेल्या गुंतवणूकदारांना तोटा होत आहे. फंड मिडकॅप फंड गटातून लार्ज अँड मिड-कॅप फंड गटात संक्रमित झाल्याने फंडाच्या तुलना-निर्देशांकांत बदल झाला आहे. पूर्वी ‘निफ्टी मिडकॅप इंडेक्स’ हा तुलना निर्देशांक होता, संक्रमणानंतर ‘निफ्टी लार्ज-मिडकॅप २०० टीआरआय’ हा तुलना निर्देशांक निश्चित करण्यात आला. त्याचे भवितव्य आशादायक वाटते. याचे कारण म्हणजे, एक, तीन आणि पाच वर्षांच्या कालावधीत या फंडाचा परतावा हा व्यापक बाजार निर्देशांकांच्या (जसे की निफ्टी ५०० टीआरआय आणि बीएसई ५०० टीआरआय) बरोबरीचा किंवा त्याहून अधिक चांगला राहिला आहे. श्रीदत्त भांडवलदार आणि अमित नांदेकर हे अनुक्रमे निधी व्यवस्थापक आणि सह निधी व्यवस्थापक आहेत.
कॅनरा रोबेको लार्ज अॅण्ड मिडकॅप फंडाची मानदंड सापेक्ष कामगिरी
| फंड | निर्देशांक | |
| 1 वर्षे | -२.०३ | २.२१ |
| 3 वर्षे | १२.७३ | १४.८६ |
| 5 वर्षे | ११.२९ | १४.२४ |
| 7 वर्षे | १५.५९ | १७.२६ |
| 8 वर्षे | १३.६१ | १५.०१ |
पूर्णचंद्र पौर्णिमेचा मनाला मोहवी ।
तेच मन चंद्राचे का कलंक दाखवी?
कुणीच ना बांधू शके मनाचा कयास
आहे मनोहर तरी गमते उदास ।
मनाला या पूर्णातल्या अपूर्णाची आस
अशी गुंतवणूकदारांची अवस्था आहे. एसआयपी खंडित न करता किंवा पैसे काढून न घेता या फंडात गुंतवणूक राखून ठेवण्याची ही शिफारस आहे.
तुमची प्रतिक्रिया किवा प्रश्न विचारण्यासाठी खालिल फॉर्म भरा:
Financial decisions can be considered in the context of your goals, time horizon and individual circumstances rather than short-term market movements.
