फुले सान झेलू तरी भार होतो…

सध्याची व्याज दर पातळी निच्चांकावर असून भविष्यात व्याजदर कपात जवळ जवळ अशक्य वाटत आहे. युद्धजन्य स्थितीमुळे नजीकच्या काळात महागाई वाढेल तासेचा या वर्षी अपुरा पाऊस होण्याची शक्यता वर्तविण्यात येत आहे. या परिस्थितीचे दोन परिणाम संभवतात. अपुऱ्या पर्जन्यमानामुळे कृषी उत्पन्न घटेल त्यामुळे ग्रामीण भारतातील क्रयशक्ती मंदावेल आणि महागाई वाढेल. याचा परिणाम केंद्र सरकारच्या रोख्यांच्या पराताव्यावर दिसून आला आहे. मागील वर्षी २९ एप्रिल २०२५ रोजी केंद्र सरकारच्या १० वर्षे रोख्यांच्या परताव्याचा दर (वायटीएम) ६.३ टक्के होता जो एप्रिल २०२६ मध्ये ७.१० पर्यंत वाढूत जावून हा लेख लिहित असतांना ६.९३ टक्के आहे. गेल्या वर्षभरात १० वर्षे रोख्यांच्या परतावा दरात जवळ जवळ पाउण टक्के वाढ झाली आहे. ज्या गुंतवणूकदारांना बँकांच्या मुदत ठेवींपेक्षा अधिक रोकडसुलभता आणि साधारण ६.५० ते ७.०० टक्के पर्यंत परतावा मिळवायचा आहे, त्यांच्यासाठी बँका आणि सार्वजनिक क्षेत्रातील उपक्रमांनी जारी केलेले रोख्यांमध्ये गुंतवणूक करणारे बँकिंग अॅण्ड पीएसयु डेट फंड हा एक विकल्प असून या फंड गटातील फ़ॅकलीन इंडिया बँकिंग अॅण्ड पीएसयु डेट फंडाचा गुंतवणूकदार विचार करू शकतात. बँकिंग अॅण्ड पीएसयु डेट फंड गटात मालमत्ता क्रमवारीत चौदाव्या क्रमांकावर असलेला हा फंड एक तीन पाच वर्षे मुदतील कामगिरीत पहिल्या तीन क्रमांकात आहे. कर्जाची वाढती मागणी आणि मंदावलेले बँकांचे ठेवी संकलन यामुळे, बँका सध्या आक्रमकपणे (अधिक व्याज दराने) ठेवी संकलित करत आहेत; तसेच आपल्या भांडवलात भर घालण्यासाठी त्या ७.५ ते ८.५ टक्के दराने ‘अतिरिक्त टायर-१ रोख्यांची विक्री करत आहेत. या संधीचा लाभ बँकिंग अॅण्ड पीएसयु डेट फंड घेत आहेत. मध्यम परतावा आणि रोख्यांची उच्च गुणवत्ता यांचा सुरेख मेळ बँकिंग अॅण्ड पीएसयु डेट फंडात साधलेला असतो.