आयातीतून गोळा होणाऱ्या जीएसटीच्या वार्षिक वाढीत २५.२% वाढ झाली आहे आणि देशांतर्गत व्यवहारांमधून ही वाढ १३.७% आहे. या संकलनातून एक गोष्ट लक्षात येते, कमी झालेली महागाई आणि अपेक्षित दर कपातीचा परिणाम आणि बदलते घरगुती खर्चाचे स्वरूप लक्षात येते. खाजगी भांडवली खर्चावर (प्रायव्हेट कॅपेक्स) आणि आर्थिक वर्ष २६ साठी भारताच्या जीडीपी वाढीच्या दृष्टिकोनावर या बदलत्या खर्चाचा संभाव्य परिणाम यांचा विचार करायला हवा. निर्देशांकांनी २७ सप्टेंबर २०२४ रोजी नवीन उच्चांक प्रस्थापित करून मोठी घसरण अनुभवली. जानेवारीपासून निर्देशांकात सुधारणा झाली असली तरी ही सुधारणा अशीच पुढे सुरु राहील किंवा निर्देशांक भविष्यात मोठी घसरण अनुभवातील हे आज सांगणे कठीण आहे. जानेवारी २०२५ ते मे २०२५ हा कलावधीत निर्देशांकात सुधारणा झाली असली तरी इक्विटी म्युच्युअल फंडांसाठी संमिश्र राहिला असून, सक्रियपणे व्यवस्थापित फंडांपैकी केवळ ३८.४५ टक्के फंडांनी मानदंड सापेक्ष चांगली कामगिरी केली आहे. या कालावधीत लार्जकॅप, मिडकॅप स्मॉलकॅप तसेच फोकस्ड मल्टीकॅप फ्लेक्झीकॅप आणि व्हॅल्यु या फंड गटात सर्वात चांगली कामगिरी लार्जकॅप फंड गटात झालेली आहे. एका बाजूला सक्रीय व्यवस्थापित फंडाची चिंता वाटावी अशी कामगिरी तर दुसऱ्या बाजूला लार्जकॅप फंड गटाची आश्वासक कामगिरी अशी स्थिती आहे. या कालावधीत ७८.५४ टक्के लार्ज कॅप फंडांनी ‘निफ्टी १०० टीआरआय’ किंवा ‘बीएसई १०० टीआरआय’ सापेक्ष चांगली कामगिरी केली आहे. या निर्देशांकांचा विद्यमान पीइ दीर्घकालीन सरासरी पेक्षा कमी असल्याने नव्या गुंतवणुकीसाठी लार्जकॅप आकर्षक वाटत आहेत. सध्याच्या परिस्थितीत अमेरिका पुरस्कृत व्यापार युद्धाचे परिणाम, देशांतर्गत कंपन्यांच्या नफ्यात वाढीची चिंता, समाधानकारक नसलेले कंपन्यांचे निकाल आणि नजीकच्या काळात रुपयाची संभाव्य अस्थिरता शेयर बाजारात गुंतवणूकदारांसाठी खडतर आव्हान निर्माण होण्याची शक्यता आहे. अशा परीस्थित लार्जकॅप फंडात गुंतवणूक करणे हा पर्याय असू शकतो.