गुंतवणुकीत वाजवी जोखीम घेऊन लार्जकॅप निर्देशांकापेक्षा (‘निफ्टी १०० टीआरआय’) अधिक परताव्याची इच्छा बाळगणाऱ्या गुंतवणूकदरांनी अदित्य बिर्ला सन लाईफ लार्जकॅप फंडाची निवड करावी. शनिवार दिनांक ३० ऑगस्ट २०२०५ रोजी या फंडाने २२ वर्षे पूर्ण करून २३ व्या वर्षात पदार्पण केले. अदित्य बिर्ला सन लाईफ फंड घराण्यात समभाग गुंतवणूक करणाऱ्या फंडात लार्जकॅप फंड सर्वाधिक मालमत्ता असणारा आहे. मध्यंतरी कामगिरी खालावलेला हा फंड मागील २-३ वर्षांपासून कामगिरीत सुधारणा दाखवत आहे. सध्या बाजाराची स्थिती लक्षात घेता फंडात गुंतवणूक करण्यासाठी एसआयपी मार्गाचा अवलंब करावा. हा फंड ३० ऑगस्ट २००२ रोजी अलायंस फ्रंटलाईन इक्विटी फंड म्हणून हा फंड अस्तित्वात आला. पुढे तात्कालीन बिर्ला म्युच्युअल फंडाने आलायंस म्युच्युअल फंडाचे अधिग्रहण केल्या नंतर हा फंड बिर्ला फ्रंटलाईन इक्विटी फंड म्हणून ओळखला जावू लागला. महेश पाटील यांची २२ नोव्हेंबर २००५ पासून या फंडाचे निधी व्यवस्थापक म्हणून नेमणूक झाली. महेश पाटील हे आदित्य बिर्ला सनलाईफचे मुख्य गुंतवणूक अधिकारी आहेत. ते लार्जकॅप फंड गटातील सर्वात अनुभवी निधी व्यवस्थापक आहेत. ते गुंतवणुकीसाठी कंपन्यांची निवड करण्यात माहीर आहेत आणि बाजाराच्या कठीण काळातही त्यांचे कौशल्य सिद्ध झाले आहे. महेश पाटील यांचे कौशल्य आणि त्यांनी अंमलात आणलेली गुंतवणूक रणनीती, ज्यामुळे दीर्घकालीन परतावा स्थिर राहण्यात निधी व्यवस्थापकांचा मोठा वाटा आहे. महेश पाटील यांची एक वेगळी गुंतवणूक शैली आहे जी त्यांनी विविध बाजार आवर्तनामध्ये यशश्वीपणे अंमलात आणली आहे. गेल्या काही वर्षांत, त्यांच्या मानदंड -जागरूक दृष्टिकोनामुळे, आणि लवचिक गुंतवणूक शैलीमुळे ते मोठ्या पोर्टफोलिओचे संतुलन साधू शकले. तसेच पोर्टफोलिओच्या तळाकडच्या (पोर्टफोलीओ टेल) भागात ते नवनवीन कल्पना पडताळून पहात असतात. त्यांच्या संमिश्र गुंतवणूक शैलीमुळे बाजाराच्या तेजी आणि मंदीच्या काळात तरून जाण्यास आणि तत्कालीन गुंतवणूक संधीचा लाभ घेण्यास सक्षम केले आहे. त्यांच्या गुंतवणूक शैली बाबत म्युच्युअल फंड विश्लेषकात अशी चर्चा असते की, ते परंपरावादी निधी व्यवस्थापक (जोखीम टाळणारे निधी व्यवस्थापक) आहेत. ते सर्वाधिक गुंतवणूक असलेल्या कंपन्यांची निवड ‘बॉटम अप’ रणनीतीनुसार करतात. तर तळाच्या कंपन्यांची निवड टॉप डाऊन पद्धतीने करतात. असेही म्हटले जाते की, गुंतवणूक दृष्टिकोन मानदंड -जागरूक असल्याने, उद्योग क्षेत्र विचलन एका निश्चित पट्ट्यात आखले जाते. हे पोर्टफोलिओमधील मानदंड सापेक्ष जोखीम नियंत्रित करण्यास मदत करते.