ज्या म्युच्युअल फंडांनी गुंतवणूकदारांच्या पदरात दोन दशके भरघोस परताव्याचे माप टाकले त्या फंडात एचएसबीसी फ्लेझीकॅप फंडाचा समावेश आहे. फंड अस्तित्वात येऊन २० वर्षे आणि ७ महिन्यांचा कालावधी लोटला आहे. फंडाच्या पहिल्या दिवशी म्हणजे २४ फेब्रुवारी २००४ रोजी गुंतविलेल्या १ लाखाचे ११ जुलै रोजी रेग्युलर ग्रोथ मध्ये २१.४१ लाख झाले असून पहिल्या दिवशी पासून ५०००ची एसआयपीला सुरवात केलेल्या १२.२५ लाख गुंतवणुकीचे ११ जुलै रोजी रेग्युलर ग्रोथ एनएव्ही नुसार ७०.८१ लाख झाले आहेत. एसआयपी परताव्याचा वार्षिक दर १५.०६ टक्के तर एक रक्कमी गुंतवणुकीचा वार्षिक दर १६.२१ टक्के आहे. फंडाची मालमत्ता जून २०२४ रोजी ४४३५ कोटी होती. फंडाच्या निधी व्यवस्थापनाची धुरा १ एप्रिल २०२४ पासून अभिषेक गुप्ता आणि वेणुगोपाल मंगत हे सांभाळत आहेत. फंडाच्या कामगिरीचा इतिहास थोडा बाजूला ठेवला आणि मागील दहा वर्षाचा विचार केला कर १० वर्षात फंडाने एक रक्कमी गुंतवणुकीवर १४.९७ टक्के तर १० वर्षात एसआयपी गुंतवणुकीवर १६.९९ टक्के वार्षिक परतावा दिला आहे. प्रदीर्घ काळापासून हा एक लार्ज-कॅप केंद्रित आणि व्हॅल्यू इंव्हेस्टमेंट वर आधारित गुंतवणूक करणारा फंड आहे. ‘अॅम्फी’च्या ताज्या आकडेवारीनुसार सर्व फंड गटात फ्लेक्झीकॅप हा सर्वात मोठा फंड गट आहे. ज्या फंड गटात अनेक नवीन आणि जुने दिग्गज फंड चांगल्या कामगिरीचे प्रदर्शन करीत असले तरी हा फंड हा गुंतवणूकदारांसाठी मागील दहा वर्षात जोखीम समायोजित परतावाकर्मवारीत ‘टॉप क्वारटाइल’ मध्ये असणारा फंड आहे. जे गुंतवणूकदार नव्याने सिस्टिमॅटिक इन्व्हेस्टमेंट प्लॅन (SIP) साठी नवीन फंडाच्या शोधात असतील अशा गुंतवणूकदारांसाठी हा एक आदर्श पर्याय होऊ शकतो.